以往都同唔少史友介紹內地同埋其他地區嘅考古發現，但史友們又有冇諗過其實香港呢個咁細嘅地方都有唔少古物喺大家身邊呢？近排就有團體喺馬灣舊村有啲新發現。

阿史所講嘅，其實就係喺「馬灣公園第二期」、馬灣舊村一帶，早前就有保育團體搵到「九龍關」紀念碑同埋碑石，據歷史資料記載，刻有「九龍關」嘅碑石應該有四塊，分別就放喺汲水門稅廠四角，而現時就只係馬灣搵到一塊。馬灣同埋其他三個位於香港周邊地區嘅稅關都係1860年代至1870年代由清政府設立，目的就係為咗打擊鴉片走私活動同埋增加稅收。

到咗1887年，為咗方便管理，以上四個稅關就合併成「九龍關」，但去到1898年就正式關閉喇！咁到底其他嘅石碑又去咗邊度，村民就話以前其實見過，但具體位置已經唔記得晒喇，所以要搵就真係要趁早！

原圖嚟自網絡